Cyflwyniad i Daliadau yn Arbor

Mae’r erthygl hon yn cynnig cyflwyniad i reoli taliadau yn Arbor, gan amlinellu’r camau y gall ysgolion eu cymryd i drefnu a defnyddio’r nodweddion talu yn effeithiol. Mae’n trafod dechrau trefnu taliadau â cherdyn, rheoli taliadau ar gyfer clybiau, teithiau a phrydau bwyd, yn ogystal â’r mesurau diogelwch sy’n gweithredu ar gyfer trafodion ar lein. Yn ogystal, mae’n esbonio’r gwahanol becynnau sydd ar gael, a sut i uwchraddio i gael rhagor o nodweddion.

Y canllaw hwn yw’r cyntaf mewn cyfres o bedwar. Dyma’r canllawiau sydd yn y gyfres hon:

1. Cyflwyniad i Daliadau yn Arbor
2. Trefnu’r ardal Taliadau er mwyn galluogi taliadau ar gyfer Siop yr Ysgol, Clybiau, Teithiau a Phrydau Bwyd
3. Hwb - Manteisio i’r eithaf ar Daliadau yn Arbor
4. Y gosodiadau a argymhellir wrth drefnu taliadau

Awgrym: Ansicr ble i ddechrau gyda thaliadau yn Arbor, neu angen cymorth i drefnu taliadau? Rhowch gynnig ar ein Canllaw i Gymorth gyda Thaliadau yn yr Ap!
 

Pa nodweddion sydd wedi eu cynnwys yn fy mhecyn?

Mae gennym bob math o wahanol nodweddion y gallwch eu defnyddio i reoli taliadau yn rhan o’ch MIS. Ehangwch yr adran isod i edrych ar y tabl a gweld grid o’r prif nodweddion sy’n gynwysedig ym mhob pecyn sylfaenol. Oddi tano, mae yna restr o’r pecynnau a’r nodweddion talu sy’n gynwysedig gyda phob un.

Awgrym: Efallai eich bod chi wedi clywed am Payments Plus. Dyna’r enw am y pecyn cyflawn o’r cynhyrchion yma.

• Siop yr Ysgol
• Bwydlenni Cylchol a’r Porth Rhieni/Dewis Prydau trwy’r Ap
• Talu ag Apple Pay neu Google Pay

I ddysgu sut i uwchraddio eich pecyn, cysylltwch â customersales@arbor-education.com

Nodweddion Core:

• Trefnu Clybiau a Theithiau Yn y pecynnau Core, Comms a Perform.
   

Nodweddion Comms:

• Gall rhieni gofrestru a thalu am glybiau a theithiau: Rhaid cynnau’r Porth Rhieni a’r Ap.

• Trefnu Prydau Bwyd: Yn y pecyn Comms diweddaraf yn unig, a Perform.

• Taliadau am Brydau Bwyd gan Fyfyrwyr a Staff: Yn y pecyn Comms diweddaraf a Perform.

• Arlwyaeth heb arian parod: Bydd angen integreiddio i drefnu hyn. Yn y pecyn Comms diweddaraf a Perform.

• Cofnodi taliadau arian parod, â siec neu drosglwyddiad banc: Yn y pecyn Comms diweddaraf a Perform.

• Prosesu ad-daliadau a chofnodi anfonebau: Yn y pecyn Comms diweddaraf a Perform.

• Cyfleuster i rieni dalu am brydau bwyd a chyfrifon ychwanegu arian eraill â cherdyn, ac i chi gofnodi taliadau ac ad-daliadau. Rhaid trefnu Taliadau â Cherdyn ar eich safle. Yn y pecyn Comms diweddaraf a Perform.
   

Nodweddion Perform:

• Bwydlenni Cylchol a Dewis Prydau bwyd yn y Porth Rhieni/App: Mae angen trefnu Bwydlenni Cylchol ar eich safle, a galluogi’r Porth Rhieni a’r Ap. Yn y pecyn Perform diweddaraf yn unig.

• Siop yr Ysgol: Rhaid trefnu Taliadau â Cherdyn ar eich safle. Yn y pecyn Perform diweddaraf yn unig.

• Talu ag Apple Pay neu Google Pay: Rhaid trefnu Taliadau â Cherdyn ar eich safle. Yn y pecyn Perform diweddaraf yn unig.
   

Sut mae taliadau’n gweithio yn Arbor?

Gallwch drefnu, gwneud a rheoli taliadau, adroddiadau ac anfonebau yn MIS Arbor, gan arbed amser a fyddai’n cael ei dreulio’n cynnal ac yn defnyddio nifer o wahanol systemau fel arall.

Mae’r ffyrdd o ddefnyddio a sefydlu taliadau yn Arbor yn ymrannu’n ddau brif fath:

• Trefniadau sy’n cynnwys talu â charden - Mae hyn yn caniatáu i rieni dalu trwy’r Ap Rhieni a’r Porth Rhieni. Gallwch reoli taliadau â llaw hefyd gan ddefnyddio arian parod, siec neu drosglwyddiad banc.
• Trefniadau heb daliadau â cherdyn - Gan ddefnyddio’r dull yma, gallwch gofnodi taliadau a wneir ag arian parod, siec neu drosglwyddiad banc â llaw yn unig.

Noder: Mae swyddogaethau taliadau â cherdyn Arbor ar gael i ysgolion:

• sydd wedi eu lleoli yn y Deyrnas Unedig, heb gynnwys Ynys Manaw
• sydd â chyfrif banc sy’n derbyn taliadau trwy BACS neu ddebyd uniongyrchol
• sydd ag unrhyw un o’n pecynnau Perform, neu ein pecyn Comms diweddaraf. Ni fydd pecynnau eraill Arbor yn cynnig y nodwedd hon yn ddiofyn. Am uwchraddio neu ganfod pa becyn sydd gennych? Cysylltwch â’ch Rheolwr Partneriaeth.
   

Dewis peidio â defnyddio Taliadau â Cherdyn

Am mai swyddogaeth taliadau â cherdyn Arbor yw’r opsiwn mwyaf cost-effeithiol a syml, rydyn ni’n argymell bod ysgolion yn ei ystyried.

Os ydych chi’n sicr nad ydych am ddefnyddio Arbor i reoli taliadau â cherdyn, gallwch symud ymlaen i’r cam nesaf ar eich siwrnai: Adeiladu - Trefnu’r maes Taliadau i alluogi taliadau ar gyfer Siop yr Ysgol, Clybiau, Teithiau a Phrydau Bwyd. Gallwch hepgor yr adran ar sefydlu taliadau â cherdyn a neidio’n syth i’r adran Sefydlu Clybiau, Teithiau a Phrydau Bwyd.
 

Defnyddio Taliadau â Cherdyn

Trwy sefydlu taliadau â cherdyn, gallwch dalu allan i nifer o gyfrifon banc a gweld dadansoddiad manwl o bob taliad, oll gyda ffi trafod ostyngol o 1.275% + TAW (sy’n rhatach na’r rhan fwyaf o ddarparwyr).

Ar ôl trefnu taliadau, gallwch symud ymlaen i drefnu eich:

• Teithiau - Digwyddiadau untro lle mae’r myfyrwyr oddi ar safle’r ysgol.
• Clybiau Safonol - Gweithgareddau sy’n digwydd drosodd a thro i fyfyrwyr
• Gofal Cofleidiol - Clybiau Brecwast neu Ar ôl Ysgol sy’n gallu cynnwys pryd bwyd
• Prydau Bwyd – Bydd Gwarcheidwaid yn ychwanegu at y cyfrif prydau bwyd, sy’n gallu cael ei anfonebu am gost pryd bwyd y myfyriwr yn awtomatig pob dydd
• Siop yr Ysgol - Eitemau Gwisg Ysgol neu o’r Siop Byrbrydiau

Byddwn ni’n dangos i chi sut i drefnu taliadau â cherdyn, wedyn sut i bennu at ba ddibenion y caiff taliadau â cherdyn eu defnyddio yn y cam nesaf: Adeiladu – Trefnu’r maes Taliadau er mwyn galluogi taliadau i Siop yr Ysgol, am Glybiau, Teithiau ac am Brydau Bwyd’
 

Sut mae taliadau’n cael eu gwneud?

Gan staff yr ysgol

O fewn eich MIS, gallwch gofnodi taliadau arian parod neu â siec am Glybiau, Teithiau a Phrydau Bwyd. Gallwch gofnodi taliadau ar gyfer Cyfrifon Cwsmeriaid myfyrwyr unigol neu aelodau unigol o staff hefyd trwy fynd i’r adran Taliadau ar ochr chwith eu proffiliau.

Gallwch gymryd taliadau â cherdyn am Brydau Bwyd a Chyfrifon Cwsmeriaid eraill (sydd wedi galluogi taliadau â cherdyn) lle bynnag y gwelwch chi’r botwm 'Talu â cherdyn/Ychwanegu arian â cherdyn' hefyd. Nid yw’n bosibl gwneud taliadau â cherdyn ar gyfer Clybiau a Theithiau trwy Arbor fel gweinyddwr - byddai angen i chi Fewngofnodi fel gwarcheidwad a gwneud y taliad â cherdyn fel petaech yn warcheidwad yn lle.
 

Gan rieni a gwarcheidwaid

Os ydych chi wedi trefnu Taliadau â Cherdyn, gall rhieni a gwarcheidwaid dalu o fewn y Porth Rhieni a’r Ap Rhieni hefyd. Cliciwch ar y linciau isod i weld esiamplau o sut mae hyn yn edrych i warcheidwaid:

• Teithiau
• Clybiau Safonol
• Gofal Cofleidiol
• Prydau Bwyd
• Siop yr Ysgol

Gallwch adio rhagor o opsiynau talu trwy sefydlu Mathau o Gyfrifon Cwsmeriaid. Cyfrifon rhagdalu yw’r rhain, sy’n golygu y gall staff r ysgol neu rieni a gwarcheidwaid ychwanegu at y balans ar y cyfrif hwn ar gyfer myfyrwyr a/neu staff - yn debyg i Brydau Bwyd - wedyn gallwch anfonebu y cyfrifon hyn â llaw i’ch helpu chi i reoli balans y cyfrifon a chodi tâl am eitemau.
 

A yw taliadau yn Arbor yn ddiogel?

Mae Arbor yn cydymffurfio â’r gofynion ar gyfer dilysu taliadau ar lein, sef Dilysu Cwsmeriaid yn Gadarn (SCA), a gyflwynwyd i wella diogelwch. Wrth wneud taliad ar lein, mae SCA yn gofyn eich bod chi’n dilysu eich bod chi pwy rydych chi’n dweud yr ydych chi. Yn Arbor, mae hynny’n golygu y bydd angen i ddefnyddwyr neu rieni gwblhau cam ychwanegol i ddilysu trafodion wrth wneud taliad trwy MIS Arbor, y Porth Rhieni neu’r Ap Rhieni.

Wrth wneud taliad a nodi manylion y cerdyn (mae Arbor yn derbyn taliadau â Visa a Mastercard yn unig), mae’n bosibl y bydd angen i chi Ddilysu’ch Taliad â Cherdyn.

Ein darparydd taliadau

Rydyn ni’n defnyddio Stripe i gyflawni taliadau â cherdyn, ond o fewn Arbor. Mae trefnu taliadau yn Arbor yn creu Cyfrif Stripe Connected ar gyfer eich ysgol.

Mae Stripe yn cymryd preifatrwydd a diogelwch o ddifri calon. Darllenwch Polisi Preifatrwydd Stripe ar eu gwefan i gael esboniad am sut ac at ba ddibenion y maent yn casglu, yn defnyddio, yn cadw, yn datgelu ac yn diogelu unrhyw ddata personol a ddarperir gan Arbor.

Mae nodweddion diogelwch Stripe yn cynnwys:

• Darparwr Gwasanaethau PCI Lefel 1 - y radd uchaf o ddiogelwch ar gyfer prosesu taliadau.
• Mae gan unrhyw drafodion a wneir trwy Stripe amddiffyniad SSL (Secure Socket Layer). Caiff yr holl wybodaeth yn cael ei hanfon yn ddiogel wrth brosesu’r taliad.
• Mae rhifau cardiau credyd yn cael eu hamgryptio, sy’n sicrhau diogelwch.
   

All-daliadau ac ad-daliadau

Awgrym: Dim ond os ydych chi wedi trefnu derbyn taliadau â cherdyn y gellir gwneud all-daliadau; fel arall, rhaid ymdrin ag arian parod y tu allan i Arbor.

Ni fydd taliadau a wneir i Arbor yn cael eu talu’n syth i’ch cyfrif banc.

Mae Arbor yn talu’r arian a gesglir o daliadau â cherdyn i gyfrifon banc yn wythnosol, bob dydd Llun (o’r dydd Sul blaenorol i ddiwedd dydd Sadwrn). Er enghraifft, yn achos y pedwar taliad yma:

• Dydd Sul, 1 Mawrth - yn mynd i’r cyfrif banc dydd Llun, 9 Mawrth
• Dydd Mercher, 4 Mawrth - yn mynd i’r cyfrif banc dydd Llun, 9 Mawrth
• Dydd Sadwrn, 7 Mawrth - yn mynd i’r cyfrif banc dydd Llun, 9 Mawrth
• Dydd Sul, 8 Mawrth – ni fydd hyn yn cael ei dalu tan y dydd Llun canlynol.

Weithiau, ni fydd yr arian o’r trafodion â cherdyn yn barod ar gyfer yr all-daliad a amserlennwyd, ac os felly, cânt eu gohirio tan y dydd Llun canlynol. Yn ogystal, gall trosglwyddiadau i gyfrifon banc gymryd hyd at dri diwrnod busnes i’w prosesu trwy Stripe. Am hynny, ni allwn warantu y bydd yr arian yn ymddangos mewn cyfrifon banc ar ddydd Llun y taliad. Mewn ambell i achos prin, gallai gymryd tan y dydd Iau canlynol i’r cyllid fod ar gael.

Bydd ad-daliadau’n effeithio ar swm yr all-daliad, sy’n cael ei gyfrifo trwy dynnu cyfanswm yr ad-daliadau o gyfanswm nifer y trafodion â cherdyn a gafwyd yn ystod cyfnod yr all-daliad.
 

Gweminar Cyflwyno

Am gael rhagor o wybodaeth ond wedi cael llond bol ar ddarllen? Gwyliwch ein gweminar ar drefnu a rheoli taliadau yn Arbor isod. Defnyddiwch yr amsernodau o dan y fideo i neidio i’r adrannau sydd o’r diddordeb mwyaf i chi.
 

Amsernodau:

• 00:00 - Gwybodaeth allweddol ar ffioedd a’n darparydd taliadau
• 02:30 - Y wybodaeth fydd ei hangen arnoch i drefnu taliadau
• 05:00 - Trefnu taliadau â cherdyn
• 08:00 - Mathau o Gyfrifon Cwsmeriaid
• 10:40 - Rheoli taliadau ar broffil y myfyriwr
• 16:30 - Clybiau
• 22:00 - Teithiau
• 27:30 - Taliadau ar y Porth Rhieni
• 34:30 - Adroddiadau ar daliadau
• 37:00 - Negeseuon atgoffa i ychwanegu arian
• 38:00 - Adroddiadau ar yr holl daliadau